Шемарчу Латаки шахьара юккъе ши ракета тоьхна «Иблисан пачхьалкхан» гIеранаша. Оцу бохамехь 23 стаг кхелхина, 60 сов стагана чевнаш хилла. Царах дукхахберш кегийрхой бу.
***
Россин тIеман кеманаша тIаьхьарчу деношкахь ондда тохар дина «Иблисан пачхьалкхан» террористийн герзаш а, патармаш а чохь хиллачу яккхийчу складашна.
***
«Иблисан пачхьалкхан» гIеранашна юкъахь бу дуьненарчу бIе сов пачхьалкхера террористаш а, экстремисташ а. СССР-ра юкъахь хиллачу пачхьалкхашкара – ворхI эзар сов стаг.
***
ХIокху деношкахь цхьаьнакхийтира Iамаркан Президент Б.Обама а, Израилан премьер-министр Б.Нетаньяху а. Цара дийцаре дира шина пачхьалкхан юкъаметтигаш чIагIъяран хьокъехь долу гIуллакхаш.
***
Великобританин Премьер-министра Д.Кэмерона дIахьедина Евросоюзана реформа ян езаш хилар а, нагахь санна иза ца еш хьал хилахь Ингалс пачхьалкх цу юккъера дIаяла тарлуш хилар а.
***
Чинас дIахьош йолу экономикин политика бахьана долуш США-на цхьана шарахь лаххара а 400 миллиард долларна зен хуьлу.
***
Мигранташ тIеэца а, дIанисбан а йолчу таронех шаьш буьззина пайдаэцна хилар а, кхул тIаьхьа уьш тIеэца шен таро цахилар а хаийтина Швецин куьйгалло.
***
Россин Президент В.Путин Москвахь цхьаьнакхийтира Кувейтан (эмирца) паччахьца. Цара дийцаре дира Герггарчу Малхбалехь долу хьал а, шина пачхьалкхан юкъаметтигаш чIагIъяран гIуллакхаш а.
***
Мехкан Правительствон рогIерчу кхеташонехь премьер-министра Д.Медведевс коьрта тидам тIебахийтира керла школаш ян езарна а, дешарна, заманан лехамашка хьаьжжина, хьелаш кхолла дезарна а.
***
Мисара лелаш хилла Россин кеманаш сацорца доьзна мехкан туроператоршна хилла 1,5 миллард сом зен меттахIотто тIелаьцна Iедало.
***
Чинина а, Россина а юкъахь махлелор шина пачхьалкхан ахчанца дIадахьар деккъа хIокху цхьана шарахь шозза алсамдаьлла.
***
ГIебартойн-Балкхаройн коьртачу шахьарахь хIокху деношкахь хIаллаквина «Иблисан пачхьалкхана» тешаме хила чIагIо йина хилла волу бандтобанан куьйгалхо IабдаллахI.
№127, еара, лахьанан (ноябрь) беттан 12-гIа де, 2015 шо