Школашкахь жамIаш даран белхаш бийр бу
Декабрь беттан хьалхарчу деношкахь Нохчийн Республикин школийн дешархоша жамIашдаран сочиненеш язйийр ю. Пачхьалкхан жамIашдаран аттестацин бакъенашца нийса а догIуш хир ду сочиненеш язъяр. Оцу хенахь цхьа бух болчу бахьанашца юкъарабевллачу дешархошна магийна сочиненеш 2016-чу шеран 3-чу февралехь а, 4-чу майхь а дIаялар. Сочинени шолгIа язъян бакъо лур ю лахара баллаш хиллачарна а, ткъа таронаш кIезиг йолчарна (заьIапчу дешархошна) изложени язйича а могуьйтур ду.
Кхиамца сочинени язйиначунна бен пачхьалкхан жамIашдаран аттестацина юкъаваха бакъо луш яц. Сочинени язъяран 235 минот ю, ткъа аьттонаш кIезиг болчу дешархошна кхитIе а 1 сахьт, 50 минот лур ю.
Школийн комиссийн тобанаша толлур бу сочиненин белхаш, церан мах хадоран хьесап баллашкахь хир дац, «Зачет» я «незачет» аьлла хир ду. Сочиненин мах хадоран бакъенаш пхеа лехамца хир ю. Уьш: билгалйинчу темица йогIуш хилар, литературин гIирс лелон хаар, сочинени язъяран композици ларъяр, логика, дийцаре дар нийса хилар, барта дийцаран а, йозанан кепийн а нийсалла.
Билгалбевлира «Адам кхиошверг» конкурсан толамхой
Соьлжа-ГIаларчу Нохчийн Республикин Хьалхарчу Президентан А-Хь.Кадыровн цIарахчу №1 йолчу гимназехь «Адам кхиошверг» конкурсан жамIаш дира. Иза дешархой кхиорехь педагогика Iилманехь керлачу технологех пайдаэцар довзийтаран Iалашонца йина яра.
Конкурсехь дакъалаца чуелла 17 заявка яра. Къасторан туран финале ваьлларг Соьлжа-ГIалара 7 кхетош-кхиархо вара. Уьш бара №3 йолчу гимназин, №20, №39, №10, №37, №57, №56 йолчу школийн хьехархой.
ТIаьххьара къовсам царна юкъахь бара. Жюрин декъашхой кхетара шайна хьалха хIоттийнарг аттачех декхар цахилара. Тоьллачарна юккъехь а тоьлларш билгалбаха дезара церан. Хьалхарчу меттехь яра Соьлжа-ГIаларчу №37 йолчу школин 7 «А» классан куьйгалхо Цугаева Зарина, шолг1ачу меттехь Соьлжа-ГIаларчу №56 йолчу школин хьехархо Эскиева Мадина, кхоалг1а меттиг яьккхира №57 йолчу школин хьехархочо Чагаева Ритас.
Толамхошна а, конкурсан дакъалацархошна а дипломаш а, зезагийн курсаш а елира.
З.ХИЗИРОВА
№128, шот, лахьанан (ноябрь) беттан 14-гIа де, 2015 шо