Соьлжа-ГIаларчу №42 йолчу школехь ингалсан мотт хьоьхуш ю Халидова Асет. БегIийла кеп карийна цунна берашна и мотт безабалийта, цунах кхета дешархошна атта хилийта. ХIора дарс ловзаран кепехь дIахьо цо. Бераша хазахетарца дакъалоцу цу ловзаршкахь. Вовшашца йохье дуьйлуш ловзаршкахь жигара дакъалацархьама Iамабо ингалсан мотт.
№42 юккъерчу школе балха яле Асета масех белхан меттиг хийцина. Цо ЧИПКРО-хь, къоман музейхь, гочдархо болх бина. Амма, муьлххачу балхахь хилча цуьнан сагатлора берашна. Школе балха кхаччалц шеконаша садуура, сайн доцу гIуллакх дуй-те ас лелош дерг, бохуш. Цундела, цхьана белхан меттигах дог ца летира. Ткъа школе балха яро хьехархочун дог-ойла хийцира, дуьне а серладелира, ирсечу кханенах дегайовхо чIагIъелира. Берийн зевнечу аьзнаша самалха доккхура. Юьхьанцарчу классашна ингалсан мотт Iамош ю Асет. Иза тешна ю хьехар нийса хилча, муьлххачу бере а цхьабосса масех мотт Iамалург хиларх. Ткъа дешархошна дарсехь дийцинарг диц ца далийта иза ловзаран кепехь дIадахьа деза. Бераш сиха дулу и санна долчу ловзарех. Церан самукъадолу хьехархочуьнца цхьаьна дIахьош долчу ловзарех, иза муьлххачу маттахь дахьош хилча а. Халидова Асетан дешархой цунна къеггина тоьшалла ду. Церан дайша, наноша тIечIагIдо и бакъдерг. ХIинццалц кхечу къаьмнийн меттан дарсех бераш къехкаш хиллехь, Асет №42 йолчу школе балха еачхьана берашна массарел дукхаеза ингалсан меттан урок, цхьана озехь билгалдоккху дешархойн дайша, наноша.
Халидова Асетан шен а ду диъ бер. Берийн беша уьш бахале Iамо болабо нанас царна ингалсан мотт. Цхьана а кепара царна хало хуьлуш а ца хета нанна. Аганара бераш гIовттушехь дIадоладо цо шен берашна цхьана метта кхо мотт Iамор; нохчийн, оьрсийн, ингалсан. ТIаккха школе боьлху хан тIекхачале цуьнан бераш хецна кхо мотт буьйцуш хуьлу. Цундела, ала йиш ю шен дахарехь зеделларг ду Асета балха тIехь дешархошка дIакхийдош дерг а. Соьлжа-ГIаларчу дешаран департаментан белхахоша дийцарехь Нохчийн Республикин коьртачу шахьарахь ингалсан меттан хьехархошна юкъахь тоьллачарех цхьаъ ю вайн турпалхо. Стаг шен меттехь хилча нисло и тайпа бIаьрла кхиамаш.
А.ГАЗИЕВА
№129, шинара, лахьанан (ноябрь) беттан 17-гIа де, 2015 шо