Мисарарчу Синайхь А-321 кема дохаран бахьана хиъна лерринчу комиссина. Иза террористаша эккхийтина. Цуьнца доьзна Россин Президента В.Путина дIахьедина и зулам дарна бехке берш дуьненан муьлхха а маьIIехь хиларх карориг хилар а, царна хьакъ боллу бекхам хирг хилар а.
***
«Иблисан пачхьалкхан» Шемахь йолчу гIеранашна бомбанаш, ракеташ еттар тIаьхьарчу деношкахь шозза алсамдаьккхина Россин кеманаша, йохийна церан ши бIе гергга объект.
***
Шеман Iедалан эскарша, Россин авиацин гIоьнца, «Иблисан пачхьалкхан» зуламхошкара схьаяьккхина 80 сов юрт. Иза 500 квадратни километр мохк бу.
***
Россин Президента В.Путина леррина кхеташо дIаяьхьира кхерамазаллин советан декъашхошца. Цигахь дийцаре дира Синай ахгIайри тIехь А-321 кема террористаша эккхийтина хиларца доьзна дан деза гIуллакхаш.
***
Россин ФСБ-с 50 миллион доллар ахча кхайкхийна Россин А-321 кема эккхийтинчеран хьокъехь хаам биначарна айкхаллина.
***
США-н тIеман кеманаша юха а герзаш кхийсина Шеман малхбалехь болчу курдашна. Уьш а бу «Иблисан пачхьалкхана» дуьхьал тIемаш беш.
***
Желтойчоьнан малхбузенан декъехь мохк бегийна. Iаламан оцу бохамехь ши стаг кхелхина, бахархойн цIенош доьхна.
***
Сербин Президент хIокху деношкахь Беларусехь ву. Цуьнан цхьаьнакхетар хилла оцу мехкан Президентаца А.Лукошенкоца а, Iедалан кхечу векалшца а.
***
Iамаркан газах пайдаэца резахилла Европера еккъа цхьа пачхьалкх ю Литва. Оцу пачхьалкхана данне а санехь хир дац «ворхI хIордан дехьарчу» газах пайдаэцар.
***
Молдавин парламенто хIокху деношкахь чIагIйина мехкан керла Правительство. Коьрта бахьана – иза Европех шен къилба дан резахилар.
***
ТIаьхьарчу деношкахь юха а карзахдаьлла Донбассера хьал, алсамдаьлла герзаш дIасадеттар. Цуьнца доьзна Контактийн тобано кхайкхам бина герзаш деттар сацор доьхуш.
***
Украинин Президента П.Порошенкос бакъо елла кхечу пачхьалкхашкарчу бIаьхошна шайн махкахь (Украинехь) тIеман Iамораш дIадахьа.
***
Россин Правительствос сацам бина герггарчу итт шарахь вайн махкахь школаш ярна 2 триллион сом ахча къасто.
№130, еара, лахьанан (ноябрь) беттан 19-гIа де, 2015 шо