Ноябрь беттан 26-чу дийнахь Нохчийчу еара Псковски областера делегаци. Царна хьалхаваьлла вара Псковски областан губернатор Турчак Александр.
Делегаци Нохчийчу яран коьрта Iалашо яра Псковски областан а, Нохчийн Республикин а зIенаш чIагIъяр. 2000-чу шеран 29-чу февраланий, 1-чу мартаний юкъахь Нохчийчохь террористашца хиллачу тасадаларшкахь кхелхинчу Псковерчу десантникашна лерина бина иэсан хIоллам схьабелларехь дакъалецира губернатора Турчак Александра. Иза схьабиллира Соьлжа-ГIалин Старопромысловски районан Псковерчу 84 десантникан цIарахчу урамехь. Иштта цигахь дакъалецира Соьлжа-ГIалин куьйгалхочо Динаев Iадлана а, кхелхинчу десантникийн гергарчара а.
– Вай даима а дагахь латтор ду вайн турпалхойн хьуьнарш. Тхан областан бахархошна хала а, лазаме а хIума ду иза дагалацар. Оха даггара баркалла боху Кадыров Рамзанна, терроризмана дуьхьал дIабаьхьначу къийсамехь эгна болу тхан турпалхой дагахь латторна, – элира Турчак Александра.
Псковерчу дивизин 104-чу полкан 2-чу батальонан командиран Евтюхин Маркан нанас Евтюхина Лидияс массарна а даггара баркалла элира шен кIант а, кхиболу десантникаш а дагахь латторна.
– Кхелхинчу салтийн а, эпсарийн а дай-нанойн а, церан гергарчеран а цIарах боху ас, 15 шо хан яьллехь а, цу бохаман лазам хIинца а тхан дегнашкахь бу. Шен доьзалхочух яьлла муьлхха а нана кхетар ю сох. Кхин цкъа а тIом ма хуьлийла вайн махкахь. Даима а маьрша стигал хуьлда вайна тIехула, – элира Л.Евтюхинас.
Иэсан хIоллам схьабиллинчул тIаьхьа, Нохчийн пачхьалкхан университетехь а, Архангел Михаилан цIарахчу килсехь а, «Нохчийчоьнан дог» маьждигехь а хилира Псковера хьеший. Цул тIаьхьа, Нохчийн Республикин Куьйгалхочуьнца Кадыров Рамзанца цхьаьнакхийтира А.Турчак. Цигахь регионийн куьйгалхоша дийцаре дира экономикехь, социальни декъехь, культурехь, дешарехь цхьаьна гIуллакхашдаран а, юкъаметтигаш чIагIъяран а гIуллакхаш.
М.КАНТАЕВ
Авторан сурт
№134, от, лахьанан (ноябрь) беттан 28-гIа де, 2015 шо