Иракехь карийна цхьанаметта алссам езидаш дIабоьхкина меттиг. «Иблисан пачхьалкхан» гIеранаша байъина бу уьш. ХIокху деношкахь террористаша кхин а цхьа теракт йина Багдадехь. Цигахь виъ стаг вийна.
***
Шемахь долчу Россин кеманаша тIаьхьарчу шина дийнахь «Иблисан пачхьалкх» террористически организацин иттаннаш мехкадаьтта доккху скважинаш а, тIеман объекташ а йохийна.
***
Камерунехь шина зудчо-террориста, шаьшшиъ а оьккхуьйтуш, теракт йина. Оцу бохамехь пхи стаг кхелхина, 15 стагана чевнаш хилла.
***
США-рчу масех штатехь хиш дестар а, шийла догIанаш дахкар а бахьанехь 14 стаг кхелхина.
***
Хонкарарчу Анкара, Истамбул, кхечу шахьаршкахь яккхий митингаш хилира масех де хьалха вийначу адвокат-бакъонаш ларъярхочун сийнна. Урамашка бевллачара лоьхура куьг бехкениг лахар а, цунна хьакъ доллу таIзар дар а.
***
Мексикерчу хьехархоша забастовка йира. Цара дIахьедира шаьш дешаран реформина дуьхьал хилар. Забастовке арабевлла хьехархой бIаьрг белхочу газаца дIасалаьхкира полицин белхахоша.
***
Парижехь дIаяьхьира экологин хьал дийцаре дарна лерина дуьненаюкъара саммит. Цигахь билгалдаьккхира гуонахара Iалам бехдеш хилар бахьанехь Iаламан бохамаш хилар алсамдолуш хилар.
***
Брюсселехь дIаяьхьира Евросоюзан а, Хонкаран а саммит. Цигахь дийцаре дира мигранташ Европин мехкашка схьаоьхуш хиларца кхолладелла кхераме хьал.
***
Дагестанехь леррина операци дIахьочу хенахь виъ террорист хIаллаквина. Царах цхьаъ Шемара ведда схьавеана хилла.
***
Ханты-Мансийски автономни округехь вертолет дохар бахьанехь цу тIехь хилла виъ стаг кхелхина, цхьаъ лазийна.
№135, шинара, гIуран (декабрь) беттан 1-ра де, 2015 шо