Дукха хан йоццуш Нохчийн пачхьалкхан университетехь «Даймехкан истори» корматаллехула йолчу диссертацин Советан декъашхойн хьалхара кхеташо хилира.
Оцу Советан председатель хаьржина историн Iилманийн доктор Осмаев Iаббаз, цуьнан заместитель – историн Iилманийн доктор Гапуров ШахIруди, Iилманан секретарь – историн Iилманийн кандидат Магомадова Тамара.
Университетан хьалхарчу проректора З.Киндаровс ректоран З.Саидовн цIарах декъалбира диссертацин Советан декъашхой. Шен къамелехь цо элира:
«И тайпа Совет кхоллар бахьана долуш, Iилманан болх жигарабаккха таро хир ю. Иштта, ВУЗ-ийн Iилманан белхаш алсамбахарна а дика Iаткъам бийр бу аьлла хета суна. Советан декъашхошна тIехь дерг доккха жоьпалла ду. Iилманан декъехь белхаш беш болу говзанчаш (Iилманчаш) вовшах а кхетта, цхьана коллективехь цара болх бича, вайн таро хир ю докторийн а, кандидатийн а диссертацеш хьакъ ма-дду чIагIъян».
Билгалдаккха деза диссертацин Совет Россин Федерацин дешаран а, Iилманан а министерствон омрица 2015-чу шеран 14-чу октябрехь вовшахтоьхна хилар.
«Диссертацин Совет вовшахтохархьама дуккха а къахьегна вайн Iилманчаша. Цу юкъахь вайн республикера Iилманчаш хилла ца Iаш, Москвара а, Астраханера а, Ростовера а, Дагестанера а, Кисловодскера а, Къилбаседа ХIирийчуьра а Iилманчаш бу. Цундела, хьалха санна, луларчу регионашка диссертаци чIагIъян лела дезар дац вайн аспирантийн. ХIинца, диссертацин Совет вовшахтоьхна хилар бахьана долуш, вайн республикехь диссертаци чIагIъян аьтто хир бу аспирантийн», – элира Советан председатела Осмаев Iаббаза.
З.ЛОРСАНОВА
№137, еара, гIуран (декабрь) беттан 3-гIа де, 2015 шо