Соьлжа-ГIалин пачхьалкхан мехкадаьттан техникин университетана хьалха йоккха митинг дIаяьхьира. Университетан масех эзар студента а, белхахоша а шаьш экстремизмана дуьхьал хилар а, зераташна тIекхийдарна реза цахилар а дIахаийтира.
Гулбеллачарна хьалха вистхилира ВУЗан ректор Таймасханов Хьасан, иштта проректорш, хьехархой, Нохчийн Республикин бусалбанийн динан урхаллин векалш, студенташ, кхиберш.
Шен къамелехь Таймасханов Хьасана Курчалойн районехь зерат дагийначарна ша реза цахилар дIахаийтира.
– Нохчаша гуттар а лардина шайн Iадаташ, культура, истори. Зерат дагор – дийцина ца валлал доккха зулам ду, оцу зуламна бехкечарна вай цкъа а къинтIера ца довллал, – элира ректора.
Философин кафедрин доцента Улубаев Султана Нохчийн Республикин исторехь иштта хIума цкъа а хилла дацара, элира.
Дай-наношка, вайн молланашка, Iеламнахе ца хоттуш, цхьаболчара мила ву а, мичахь ву а ца хууш волчуьнга ладоьгIуш хаало. Вайн студенташкара ишттаниг далийта мегар дац. Студенташ вайн къоман юьхь а, тIекхуьучарна масал а хилла латта безаш бу, – билгалдаьккхира С.Улубаевс.
Зератна тIекхевдинчарна шаьш реза цахилар а, республикин куьйгаллин некъ шаьш къобалбар а цхьабосса дIахаийтира гулбеллачара.
И.ХАСАХАНОВ
Авторан сурт
№137, еара, гIуран (декабрь) беттан 3-гIа де, 2015 шо