ХIокху деношкахь Москва гIалахь дIаяьхьира паргIатчу кепара а, греко-римски охьатохархлатарехула «Аларос» цIе йолу Европин къаьмнийн Кубок яккхаран турнир. Цигахь дакъалоцуш яра Европин 8 пачхьалкхера командаш: Польшера, Гуьржийчуьра, Белоруссера, Азербайджанера, Эрмалойчуьра, Хонкарара, Германера, Словакера, Россера. Вайн Республикера Россин вовшаштоьхначу команда юкъахь дакъалоцуш 3 спортсмен вара. Къийсадаларш дIадаьхьира кхаа дийнахь. Финалехь паргIатчу кепара охьатохархлатарехула вовшахкхийтира Россин а, Азербайджанан а командаш. Счет 5:3 йолуш толам баьккхира Россин командо. Иштта греко-римски охьатохархлатарехула Азербайджанан а, Россин а командашна юкъахь счет 6:2 йолуш толам баьккхира Россин вовшахтоьхначу командо.
– Билгалдаккха деза паргIатчу кепара охьатохархлатарехула финалехь шех леташ хиллачу Гуьржийнчуьра спортсмена тIехь жамI 12:0 долуш толам вайн спортсмена Чакаев Ахьмада баьккхина хилар (61 кг), ткъа Джукаев Расула (70 кг) жамI 5:2 долуш эшийра шех леташ волу Белоруссера спортсмен (61 кг). Греко-римски охьатохархлатарехула шех леташ хиллачу Азербайджанерчу Мамедов Камеранна тIехь толам баьккхира Альбиев Исламбека (66 кг), – элира Нохчийчоьнан спорт охьатохархлатарехула йолчу Федерацин вице-президента Даудов Iабдул-ГIанис.
Цу тайппана хIокху къийсадаларшкахь вайн кхаа спортсмена хьалхара меттигаш ехира.
Толамхошна совгIаташ дира.
З.ШИШХАНОВА
Архивера сурт
№140, еара, гIуран (декабрь) беттан 10-гIа де, 2015 шо