Нохчийн Республикин Куьйгалхочо Кадыров Рамзана Республикин къоман политикин, арахьарчу зIенийн, зорбанан, хаамийн министерствона хьалха хIиттийначу коьртачу Iалашонех ду граждански цхьаалла чIагIъярна гIолацар, къаьмнийн юкъаметтигаш тояр, къаьмнийн культурийн тайп-тайпаналла ларъяр.
Цу Iалашонца дуккха а болх бо Нохчийн Республикин къоман политикин, арахьарчу зIенийн, зорбанан, хаамийн министра Умаров Джамбулата. Иштта, дукха хан йоццуш, цо дакъалецира Политологийн дуьненаюкъарчу «Россин Кавказ» III-чу форумехь. Цигахь иштта дакъалоцуш вара Къаьмнийн гIуллакхашкахула йолчу федеральни агентствон Куьйгалхо Баринов Игорь, Дагестанан Куьйгалхо Абдулатипов Рамазан, Россин политологаш, юкъараллин гIуллакххой, Iилманчаш, кхиберш.
Форуман программи юкъахь дара пленарни кхеташонаш, тайп-тайпанчу теманашца «горга стоьлаш», семинараш, гайтамаш-презентацеш, мастер-классаш, иштта культурин гIуллакхаш а дIадахьар.
– Къоман шатайпаналла чIагIъярна, къаьмнашна юкъахь барт хиларна, мехкан историн-культурин а, политикин а дахарехь Кавказо лелон маьIна а, дIалоцу меттиг а йовзийтарна Россин къаьмнийн цхьааллина хIокху гIуллакхо (форумо) дика хьелаш кхуллург хиларх тешна ву со. Цхьаьна къахьегахь, Россин цхьаалла чIагIъярехь муьлхха а Iалашонаш кхочушъялур ю вайга, – элира Умаров Джамбулата шен къамелехь.
Иштта, цо билгалдаьккхира Нохчийн Республикин Куьйгалхочо Кадыров Рамзана оцу г1уллакхан къаьсттина терго еш хилар а, пачхьалкхан къоман политика кхин а дика кхочушъярна шаьш тIенисдеш хилар а.
А.ВАХАЕВА
№143, еара, гIуран (декабрь) беттан 17-гIа де, 2015 шо