Кишин Кунта-Хьаьжин цIарах йолчу Россин исламан университетан хьехархоша Веданан рузбанан маьждигехь кхаа дийнахь дIабаьхьира районерчу яртийн маьждигийн имамийн Iеламнехан, школашкахь бусалба дин хьоьхучу хьехархойн Iилма лакхадаккхаран курсаш. «Къаьмнийн а, динийн а юкъаметтигаш чIагIъярехь суфизман а, Нохчийн Республикин Iеламнехан а маьIна. Исламан синан а, социально-оьздангаллин а бехкамаш» цIе йолчу программица дIадаьхьира и мехала гIуллакх.
Иштта, Нохчийчохь дика вевзаш волчу Iеламстага, лакхахь хьахийнчу университетан «Исламан бакъо» кафедрин заведующис Баснукаев Хьасан-Хьаьжас дийцира бусалба динехь доьзалехь вовшашца хила йогIуш йолчу юкъаметтигех лаьцна. Iаламат мехала ду нохчийн доьзалшкахь уьш йовзийтар а, хилийтар а. Цунна хир дара маьждигийн имамаша а, школашкарчу хьехархоша а Iеламстага бечу хьехаме леррина ладогIар. Цуьнан къамел чекхдаьлча, цуьнга дуккха а хаттарш дира цара. Баснукаев Хьасан-Хьаьжас церан массо а хаттарна кхачам боллуш жоьпаш делира. Юккъерчу барамехь 150 сов стаг вара хьехамашка ладогIа веанарг. Цара даггара баркалла, Дела реза хуьлда элира Кишин Кунта-Хьаьжин цIарахчу университетан хьехархошна шаьш долчу дахкарна, шаьш Iилманехь совдохуш, шайца къамелаш дарна, хьехамаш барна.
Билгалдаккха деза оцу университетан хьехархой и санна болу белхаш Нохчийчоьнан ерриге а районашкахь дIабахьа дагахь хилар. Дала къобалдойла церан нийят. Дала тIаьхье беркате йойла.
С.ХАМЗАТОВ
№147, пIераска, гIуран (декабрь) беттан 25-гIа де, 2015 шо