А.Айдамировн цIарахчу къоман библиотекехь Альтемиров Iаьрбин «Даг чохь ю бIаьсте» книга йовзийтар дIадаьхьира хIокху деношкахь. Цигахь гулбеллера цуьнан кхолларалла евзарш, езарш, гергара нах, поэзиезархой, культурин белхахой. Вайн республикехь дика евзаш йолу нохчийн меттан хьехархо Вагапова Асет яра книга йовзийтар дIахьош.
Хьалхара дош делира яздархочуьнга Айдамирова Машаре: «Книга арахецар чIогIа жоьпалле гIуллакх ду. Ша язйинарг ешархошка дIакховдо хууш хила везаш ву муьлхха а яздархо. Хууш ма-хиллара, поэзи уггаре а чолхе жанр ю. Iаьрби публицистикехь а, поэзехь а, прозехь а язъеш ву. «Даг чохь ю бIаьсте» книга арахецар Iаьрби доггаха къахьоьгуш хиларан билгало ю», – элира цо.
Iаьрбин кхоллараллех шена хетарг элира Нохчийн Республикин Яздархойн союзан председателан заместитела, «Даймохк» газетан коьртачу редактора Шамсудинов Бувайсара: «Нохчийн маттахь язъечу хенахь уггаре а коьртаниг цу маттахь ойла яр ду. Оьрсийн маттахь ойла а еш язйинарг гуш хуьлу. Iаьрбис арахецначу «Даг чохь ю бIаьсте» книги тIехь суна уггаре а дика хийтира цо язбина биъмогIанаш. Уьш хьаьнг-хьаьнгга а ца язло. Иза Iаьрбин кхиам бу аьлла хета суна».
Иштта шайн къамелаш динчара билгалдаьккхира Iаьрби шен доьзална дика да а, гергарчарна дика накъост а хилар, белхан накъосташна оьшучохь цо гIолоцуш хилар.
Баьхкинчарна хаза кхаъ хиллера вевзаш волу композитор, иллиалархо Димаев Iела цига веана хиларх. Книга зорбане яларца, автор декъал а веш, цунна совгIатна илли элира цо.
Цул тIаьхьа Альтемиров Iаьрбин дешнаш тIехь даьккхина илли элира Хаджаев Рамзана. Книгин автора баьхкинчарна баркаллин дешнаш а олуш, дерзийра цхьаьнакхетар.
З.ЛОРСАНОВА
Авторан суьрташ тIехь: Альтемиров Iаьрби а, цхьаьнакхетаран дакъалацархой а
№149, шинара, гIуран (декабрь) беттан 29-гIа де, 2015 шо