Хууш ма-хиллара, вайн республикин ерриге а школашкахь дIахьош ду Керлачу шарна лерина даздарш. Иштта кху деношкахь Грозненски районерчу Октябрьски юьртан юккъерчу школин дешархоша а даздира и башха, самукъане цIей. Актови зала чохь бес-бесара тIе тайнигаш оьхкина, кечйина дIахIоттийна яра базалг. Хаза, кегий полларчий санна, тIе кIайн кучамаш юьйхина зудабераша а, тайп-тайпанчу акхаройн костюмаш, туьйранашкарчу турпалхойн духарш дуьйхинчу божабераша а кхин а хаздора даздарш. Шарахь цкъа бен ган йиш йоцу Керлачу шеран коьрта турпалхой: ГIура-Дада а, Лайн-Аьзни а гучудаьлча, берийн хазахетаран доза дацара. Дешархоша ша-ша дика еша а хьожуш, оьрсийн а, нохчийн а меттанашкахь байташ йийшира. И тайпа хаза совгIаташ кечдар тидамза ца дисира. ГIура-Дадас ша деана мерза совгIаташ дIаделира дешархошна. Керлачу шарна лерина программа дIаяьллачул тIаьхьа, дешархоша ГIура-Дадица, Лайн-аьзница безамна суьрташ дохуш, нохчийн хелхарш деш кхидIа а дIадаьхьира керла шо даздар.
З.САГАЕВА
Суьрта тIехь: Октябрьски юккъерчу школин дешархой
№150, еара, гIуран (декабрь) беттан 31-гIа де, 2015 шо