ОвгIанан хIаваан тIеман ницкъийн кеманаша бомбанаш, ракеташ тоьхна хIаллаквина «Иблисан пачхьалкх» террористически организацина юкъара 20 сов зуламхо.
***
Шеман Iедалан эскарша Латакии гIалахь гIаттамхошкара схьаяьккхина церан коьрта гIап-чIагIо, гIаттамхой дIасалаьхкина.
***
Хонкарарчу Стамбул шахьаран Султанахмад майданахь (ша эккхаш) эккхийтар дина Шемарчу террориста. Оцу бохамехь 11 стаг кхелхина, 15 стагана чевнаш хилла. Кхелхинчарах 9 стаг ФРГ-ра ву.
***
Махкана а, халкъана а муьтIахь, тешаме хила чIагIо йина хIокху деношкахь Тунисан керлачу правительствон декъашхоша.
***
Индехь басах яхана дешархой школашка буьгуш йолу автобус. Цу тIехь хиллачу дешархойх виъ кхелхина, вейтта лазийна.
***
Мохк бегийча бохам хиллачу Таджикистанерчу бахархошна 32 тонна гуманитарни гIо дахьийтина Россин МЧС-о, ткъа Пакистано – 1 миллион доллар ахча.
***
Украинин Iедало чекхдаьллачу 2015-чу шарахь шайн эскарш 250 эзар стагана алсамдаьхна.
***
Украино 2015-чу шарахь кIора баккхар 38,8 процентана лахдина. Оццу хенахь, беза мах а луш, дозанал арахьа кIора эцар шозза алсамдаьлла.
***
Россин Президент В.Путин цхьаьнакхийтира «Аэрофлотан» генеральни директорца В.Савельевца. Цара дийцаре дира «Аэрофлот» кхидIа а кхиоран хьокъехь долу гIуллакхаш.
***
Вайн мехкан Президента В.Путина 80 шо кхачарца декъалвира Латвера композитор Р.Паулс. Цуьнан цIе дика евза Россехь а, СНГ-н мехкашкахь а.
***
Россин Премьер-министра Д.Медведевс правительствон совгIаташ дира мехкан шуьйрачу хаамийн гIирсийн векалшна.
***
Карарчу шарахь Россин малхбузе декъехь керла кхо дивизи вовшахтухур ю. Оцу хьокъехь хаам бина мехкан оборонан министра С.Шойгус.
***
Японин кхечу мехкашца долчу гIуллакхийн экс-министраца хиллачу цхьаьнакхетарехь Россин МИД-н куьйгалхочо С.Лавровс дIахьедира: «Росси кийча ю Японица йолу юкъаметтигаш дерриге а дакъошкахь кхиорехьа болх бан».
№3, еара, кхолламан (январь) беттан 14-гIа де, 2016 шо