Кху деношкахь Нохчийн Республикин Куьйгалхо Кадыров Рамзан цхьаьнакхийтира республикин шуьйрачу хаамийн гIирсийн куьйгалхошца. Цигахь дийцаре дира хаамийн гIирсийн болх жигарабаккхаран хьокъехь долу гIуллакхаш а, экстремизмана а, терроризмана а дуьхьало яран некъаш а.
Регионан Куьйгалхочо билгал ма-даккхара, Нохчийн Республикин хьалхарчу Президента, Россин Турпалхочо Кадыров Ахьмад-Хьаьжас къаьсттина тидам тIебохуьйтура шуьйрачу хаамийн гIирсаш кхиорна.
– Цуьнан гIоьнца меттахIиттийна телевиденеш, радиош, зорбанан изданеш. Уггаре а хьалха юхаметтахIоттийна Зорбанан цIа, схьайиллина Россехь а тоьллачарех йолу «Грозный» телевидени, – бохура цо.
Кадыров Рамзана дийцарехь, къаьсттина тидам тIебахийта беза экстремизман, терроризман идеологина дуьхьало ярна. И белхаш денна дIабахьа а беза. Цо билгал ма-даккхара, телевизионни а, зорбанан а материалашкахь вай гайта деза эладиташ даржош берш нийса цахилар а, уьш Россин пачхьалкхан мостагIий хилар а.
– Малхбузен цхьаболу шуьйрачу хаамийн гIирсаш Россехь долу хьал галдаккха гIерташ къахьоьгуш бу. Иштта хьал хIоьттина хилча, вайн юьстах девлла Iан йиш яц. Царна дуьхьало ярехь къахьега деза вай, – элира цо.
Кадыров Рамзана дIахаийтира журналисташ беш болчу балхана ша реза цахилар, цо СМИ-н куьйгалхошна тIедиллира йоццачу ханна массо а агIор болх жигарабаккхар а, тобар а.
– Шун балхана кхоьллина тIех дика хьелаш ду, аш мало а ца еш болх бахь вай кхиамаш бохур бу, мостагIий шайн метта охьа а ховшор бу. Цу тIехь шун Дала аьтто бойла, – бохура цо.
Цхьаьнакхетаран чаккхенехь Нохчийн Республикин къоман политикин, арахьарчу зIенийн, зорбанан, хаамийн министра Умаров Джамбулата дош делира йоццачу хенахь болх тобан, кхузахь динчу къамелан нийса маь1на даккха.
Р.РАМЗАНОВ
№3, еара, кхолламан (январь) беттан 14-гIа де, 2016 шо