Нохчийн Республикин Куьйгалхочун Кадыров Рамзанан тIедилларца халачу хьелашкахь Iаш болчу Грозненски районан Нагорни юьртарчу ДужуевгIеран доьзална гIо дина.
Шайн доьзалехь нисделла долу хала хьал социальни сеташкахь республикин Куьйгалхочуьнга яздинчу кехатехь довзийтира ДужуевгIара. Ден-ненан а, доьзалерчу цхьана кIентан а могашалла ледара хиларх лаьцна дийцира цара.
Нохчийн Республикин Парламентан депутат Ахмадов Хьасан коьртехь а волуш, комисси яхийтира республикин Куьйгалхочо шега яздинчу кехата тIехь дуьйцург талла. Оцу доьзалехь диъ бер ду, кхоъ жима а долуш. Да а, нана а, жимах волу кIант а чIогIа хала цамгарш йолуш, сихонца дарба дан дезаш карийна. Иштта, доьзал чохь Iаш болу хIусам вуно ледара хьелаш долуш хилар а гучуделира.
ДужуевгIара дийцира гергарчу наха, шайн ницкъ кхочучу барамехь, гIо до шайна, аьлла. Делахь а, иза ца тоьа. Берриге а доьзална тIехь Iуналла дар воккхах волчу кIантана Лоьмина тIедоьжна, ткъа цуьнан 19 шо бен дац.
Кадыров Рамзанан тIедилларца, оцу доьзалан нана, ПетIамат, Соьлжа-ГIалин № 9 йолчу больнице охьайижийна. ХIусамдена Муслимна республикин онкодиспансерехь дарба дан долийна. Иштта, ДужуевгIарна совгIатна машен а елла, герггарчу хенахь тодийр ду церан хIусамера хьелаш а.
Кханалерчу Къематдийнахь адамашна уггаре а чIогIа карор долчу гIуллакхех ду дуьнен чохь даьккхина сагIа. Баккъал а Делера йоккха ял йолуш гIуллакх ду иза. Мискачу доьзална гIо дар къаьсттина деза ду.
А.ВАХАЕВА
№4, шот, кхолламан (январь) беттан 16-гIа де, 2016 шо