Нохчийн Республикин Куьйгалхо Кадыров Рамзан кху деношкахь Шелковски районерчу Кхара-Кхаьлларчу Культурин цIийнехь цхьаьнакхийтира школийн директоршца. Цигахь дакъалоцуш бара: Нохчийн Республикин Куьйгалхочун а, Правительствон а Администрацин куьйгалхо Кадыров Ислам, Нохчийн Республикин Парламентан Председатель Даудов Мохьмад, Нохчийн Республикин дешаран а, Iилманан а министр Байханов ИсмаьIил, кхиберш. Цигахь дийцаре дира вайн республикерчу школашкахь пачхьалкхан юкъарчу экзаменна (ЕГЭ) кечамаш баран гIуллакх.
Кадыров Рамзана билгалдаьккхира вайн регионехь ЕГЭ къеггинчу тидамца дIахьош хилар а, дешархойн хаарш дика хилийта кхидIа а иштта хила дезар а.
– Цара дешар Iаморе хьаьжжина бен оценка хIоттон ца еза дешархошна. Церан дай-наношна а, иштта оцу дешархошна шайна а хаа деза пачхьалкхан юкъара экзамен дIаяларан догIа – хаарш бен цахилар. Экзамен дIаяла ца хууш, хаарш ледара дерш чекхбуьйлуьйтуш, харцо лелош хилахь – иза а гучудер ду, цхьа а харцо а лелайойтур яц, – бохура цо – ерриге а школийн хьехархоша, экзаменаш шайгга дIаялалур йолчу хьолехь Iамо беза дешархой. Цу тIехь жоьпалле бу директорш а. Дешар лаккхарчу тIегIанехь хилийтарехьа вай дуккха а къахьегна школашкахь оьшуш долу хьелаш кхуллуш. Делахь а, хьелаш дика а долуш, дешарна тIехь ледарлонаш йолуш ю цхьайолу школаш. Иза школин директор шен балхаца бала болуш цахиларан билгало ю.
Цул тIаьхьа Кадыров Рамзанан цхьаьнакхетар а, район кхиорехь дан дезачу гIуллакхийн хьокъехь мехала къамел а хилира меттигерчу администрацин векалшца, тайп-тайпанчу предприятийн, организацийн белхахошца.
И цхьаьнакхетар чекхдаьлча, регионан Куьйгалхо а, цуьнца цхьаьна хилла накъостий а ахархойн-фермерийн «Жайна» бахамехь хилира. Цигахь кхиош ялх эзар уьстагI, ах эзар гергга бежана, бIе гергга говр ткъа иштта эзарнаш зIакардаьхни ду.
И.МАТАГОВ
№4, шот, кхолламан (январь) беттан 16-гIа де, 2016 шо