Чекхдели ерриге а Россехь Литературин шо аьлла билгалдаьккхина долу 2015-гIа шо. Беркате хилира иза вайнехан яздархошна. Нохчийн Яздархойн союзо 30 гергга книга зорбане яьккхина цу шарахь. Уьш вайн махкарчу яздархойн а, поэтийн а говзарш ю. Царна юкъахь ю 2015-чу шеран декабрь баттахь зорбане яьлла «Души натянутые струны» цIе йолу гулар а. Цуьнан автор вайн махкахь а, дозанал арахьа а вевзаш волу журналист Юсупов Руслан ву. Журналистикехь кхиамца болх барх тоам беш вац иза. Дукха хан ю цо «поэзи» цIе йолчу исбаьхьачу хьаьттахь къахьоьгу а. Хьалха зорбане яьлла поэтически ши гулар яра цуьнан. Бакъду, уьш оьрсийн маттахь зорбане евлла яра. Дукха хьолахь, оьрсийн маттахь яздеш вара Юсупов Руслан. Цундела, къаьсттина мехала ду тIаьххьара зорбане яьллачу гуларехь масех байт, поэтан ненан маттахь хилар. Гулар ийна ю. Цу тIехь проза, поэзи ю, уьш оьрсийн маттахь, нохчийн маттахь язйина ю. Амма даима санна чулацаме, дешархойн синкIоргене кховда ницкъ кхочуш ду автора яздина долу могIанаш. Цара адамалле, дикане, къинхетаме, Даймохк безаре кхойкху. Ткъа уггаре а коьртаниг Юсупов Русланан лирически турпалхочо шен гIайгIанашна, сингаттамашна декъаийзаво дешархо. Ишттачарех цхьаъ лара мегар ду , цуьнан «Дика кхаж баьлла сан экаме дог» цIе йолчу рубрикера «Экаме дог» цIе йолу стихотворени. Иза нохчийн маттахь дешархо кхетар волчу кепехь язйина ю. Деэшначунна орцанца гIатта каялар Делера совгIат хетачарех ву автор. Цу исбаьхьачу зовкхе вайх хIора а дIакхойкху цо. Халкъан а, мехкан а дуьхьа хьанал къахьега аьтто хиларна, шен экамчу дагна ирсе кхаж баьлла лоьруш ву Юсупов Руслан. Книга лерина ешначу хIора а дешархочунна, мехала синкхача хилла дIахIуттур йолуш ю цуьнан «Души натянутые струны» цIе йолу гулар. Теша лаьа, кхидIа а цуьнан керлачу книгаша вайн дегнаш хьоьстург хиларх.
Газиева Аза
№5, шинара, кхолламан (январь) беттан 19-гIа де, 2016 шо