Нохчийн Республикин хьалхарчу Президентан, Россин Турпалхочун А-Хь.Кадыровн цIарахчу регионан юкъараллин фондо Нохчийн Республикин дарбалелоран учрежденешна пехашна мох кхетийтаран тоьллачех болу гIирсаш белла.
Регионан юкъараллин фондан президентан Кадырова Айманин а, Нохчийн Республикин Куьйгалхочун Кадыров Рамзанан а тIедилларца дарбалелоран гIирсаш больницашка дIакхачийра Нохчийн Республикин могашалла Iалашъяран министра Ахмадов Мусас а, юкъараллин фондан векалша а.
ХIинцца дина бераш дахар кIелхьарадахарна а, уьш больницин хьелашкахь (могашалла чIагIъяллалц) лелорна а оьшуш болу пехашна мох кхетийтаран (садеIийтаран) гIирсаш Республикин берийн клинически больницин а, Кадырова Айманин цIарах йолчу ненан а, беран а могашалла ларъяран республикин клинически туьшан а реанимацин отделенешна белла. Цул сов, фондан чоьтах, оцу гIирсашца лело оьшуш йолу дуккха а материалаш а эцна, уьш а елла больницашна.
«Республикин куьйгалло дарбалелоран учрежденешна дуьххьара деш гIо дац хIара. Керла гIирсаш бахьанехь хIинцца дина бераш кхалхар хаъал лахлур ду вайн республикехь. Берриге а медбелхахойн цIарах доккха баркалла олу ас Кадырова Айманина а, Кадыров Рамзанна а могашалла Iалашъяран учрежденешна гуттар а терго ярна», – элира министра М.Ахмадовс, ша больницашна гIирсаш дIалучу хенахь.
А.ХАСБУЛАТОВА
№5, шинара, кхолламан (январь) беттан 19-гIа де, 2016 шо