ХIокху деношкахь Соьлжа-ГIаларчу №12 йолчу гимназехь схьайиллина Нохчийн Республикин дешаран а, Iилманан а министерствос хIора шарахь дIахьош йолу Ерригроссин дешархойн олимпиада – 2016.
Билгалдаккха деза Олимпиадин дакъалацархой хIора шарахь алсамбовлуш хилар. Цо гойту дешаран дикаллин а, дешархойн хаарийн а тIегIанаш лакхадовлуш хилар.
Дагадаийта лаьа Олимпиада 18 предметехула дIахьош хилар. ХIокху шарахь цигахь дакъалаца шайн лаам хилар хаийтина 9, 10, 11-чуй классашкарчу 557 дешархочо.
Толамхой а, совгIатан меттигаш яьхнарш а дипломашца билгалбохур бу. Ткъа Олимпиадин толамхой кечбинчу нохчийн а, оьрсийн а меттанийн, литературин, математикин, физикин, информатикин хьехархошна 50 эзар сом лур ду; химин, биологин, географин, кхечу къаьмнийн, историн, обществознанин, бакъонан, астрономин, физически культурин хьехархошна – 30 эзар сом.
Вовшахтохараллин комитето Олимпиадин жамIаш довзуьйтур ду 10-гIа февраль тIекхачале.
Л.ДАУТОВА
Авторан сурт
№6, еара, кхолламан (январь) беттан 21-гIа де, 2016 шо