Иза билгалдаьккхира министра И.Байхановс
Нохчийн Республикин дешаран а, Iилманан а министерствона 2016-чу шарахь хьалха лаьттачу декхарех ду корматаллин юккъерчу дешаран а, белхан говзаллин а тIегIа лакхадаккхар. Цуьнца доьзна Нохчийн Республикин дешаран министр И.Байханов цхьаьнакхийтира колледжийн а, техникумийн а директоршца.
Цигахь министра билгалдаьккхира дешархошца бан безаш болу болх жигара баккха безаш хилар. Иштта, цо царна тIедиллира шайн учрежденешкахь муьлха корматаллин меттигаш ю хаийтар а, хаамийн-кхеторан кепара гIуллакхаш дIаяхьар а.
«Таханлерчу хьоло гойту берриге а дешархой дика доьшуш цахилар а, ЕГЭ дIаяла уьш кийча цахилар а. И санна болу дешархой 8–9-чуй классашкахь болчу хенахь дуьйна кечбан беза колледжана, техникумашна. Коьртаниг – уьш кхето беза, масала, сварщикана, автомеханикана сиха болх карош хиларх а, церан алапа лакхара хиларх а, уьш дешна сиха бовлуш хиларх а», – элира министра.
ТIедогIучу 3–5 шарахь муьлха белхалой оьшур бу тидаме а оьцуш, Нохчийн Республикин къинхьегаман, нах балха нисбаран, социальни кхиоран министерствоца цхьаьна болх дIабахьа безаш хилар а, кхечу регионашкахь йолчу корматаллин юккъерчу а, лаккхарчу а дешаран учрежденийн кхин а филиалаш вайн республикехь схьайоьллург хилар а билгалдаьккхира И.Байхановс.
Иштта, Нохчийн Республикин дешаран а, Iилманан а министерствехь дийцаре деш ду Курчалойн районехь техникум схьаелларан гIуллакх.
Л.ИБРАГИМОВА
№6, еара, кхолламан (январь) беттан 21-гIа де, 2016 шо