ООН-н леррина волу векал де Мистура Женевехь цхьаьнакхийтира Шеман Iедалан делегацин декъашхошца. Оцу шахьарахь дIадуьйладелла Шемехь долу хьал маслаIате дерзоран дийцарш.
***
Россин тIеман кеманаша гIо а деш, Шеман Iедалан эскарша мехкан къилбехь «Иблисан пачхьалкхан» гIеранех паргIатйохуш ю иттаннаш ярташ.
***
Сомали пачхьалкхехь пассажирийн кема гIоттучу хенахь цу тIехь эккхар хилла. Цхьа пассажир кхелхина, масех лазийна. Кеманахь верриге а 60 стаг хилла.
***
Иорданин паччахьа IабдаллахI ШолгIачо дIахьедина: «Шемара тIамах бевдда баьхкинчара Иорданера хьал карзахдаккхарна боккха кхерам кхоллабелла».
***
Гондурасан Iедало «Зика» ун даржарца доьзна махкахь кхераме хьал дIакхайкхийна. Кхечу пачхьалкхашкахь а яьржаш ю и цамгар.
***
Хонкар пачхьалкхо январь баттахь 3,4 процентана алсамдаьккхина Россера газ кхечу мехкашна йохкар.
***
Мисаран Iедало тIаьхьарчу хенахь дикка алсамдаьккхина Россина стоьмаш а, хасстоьмаш а бохкар.
***
Россин Президента В.Путина телефонехула къамел дира Германин Канцлерца А.Меркельца. Цара дийцаре дира Украинера хьал.
***
В.Путина къобалдина Д.Медведевс Росграница дIа а йоккхуш, цуьнан декхарш транспортан министерствона тIедахкаран хьокъехь дина дIадолор. Цу хьокъехь хIинцале Указ арадаьккхина.
***
Россин премьер-министра Д.Медведевс правительствон декъашхошца дIаяьхьначу рогIерчу кхеташонехь йийцаре йира мехкан экономика кхиоран план.
***
Россин а, Казахстанан а дозанехь схьалаьцна наркотикаш йохьуш вогIуш хилла Киргизин вахархо. Цуьнгара схьаяьккхина 25 кийла (героин) наркотик.
***
ГIалгIайчуьрчу Несарехь герз тоьхна дийна машенахь догIуш хилла зудий, стаггий. Зулам динарг лохуш ву.
№12, еара, чиллин (февраль) беттан 4-гIа де, 2016 шо