Иштта яра хIокху деношкахь къоначу хьажархочун театран зала чохь Соьлжа-ГIаларчу №37 йолчу юккъерчу школин дешархошна, кегийчу хьовсархошна гайтинчу спектаклан цIе. Иза хIоттийнарг а, цуьнан режиссёр а Делаев ЯрагIи вара.
Спектакль гайтале хьалха, театран актёраша I.Вакуевас а, Л.Вискаевас а, иштта кхечара а некъан боламан бакъенаш талха ца яйтаран Iалашонца кхеторан болх д1абаьхьира дешархошца.
Цул тIаьхьа дIадолийра цара спектакль гайтар. Вайн къоман Iадаташ а, ламасташ а довзуьйтуш яра спектакль. Цу юкъадогIура баккхийчаьрца лераме хилар а, юкъараллехь муьлххачо шегара дика масал гайта дезар а, 1илманаш 1амон дезар а. Спектакло гойтург шайн воккхах волчу вешица а, цуьнан хIусам-ненаца а долчу шина буоберан чолхе дахар дара. Туьйранан коьрта турпалхой халчу хIуьттура шайн нус бахьана долуш. Юьххьехь дуьйна а несан цабезам бара цаьрга. Амма, оцу буобераша шайгара оьгIазалла я гIиллакхех бохар а ца гойтура, мелхо а шайн дикалла а, собар а гучудоккхура.
Берашна пайдехь хир ю аьлла хета и спектакль.
И. МАТАГОВ
№15, еара, чиллин (февраль) беттан 11-гIа де, 2016 шо