2013-чу шарахь Нохчийн Республикин культурин министерствон Iуналлехь йолчу халкъан кхоллараллин туьшо кхайкхийна «Нохчий оьзда йоI» дIахьош вайн республикехь конкурс яра, Мил-милла а юкъа вуьтуш вацара оцу конкурсана. Юьрто билгалъяьккхина, хаьржина, къобалйина хила езаш яра конкурсехь дакъалоцуш йолу йоI. Хаза хиларх тоьаш дацара иза. ГIиллакх-оьздангалла долуш хила езаш яра. Цул сов, цIахь-чохь оьшучунна мелла а маха боккхуш хила езаш яра. Масех мур бара конкурсан. Цкъа хьалха юьртахь, тIаккха кIоштахь кхиамца зерех чекхъяьлла кхача езаш яра йоI республикин къовсаме. Иштта зерех чекхъяьлла, Веданахь хьалхара меттиг яьккхина кхечира Висханова Iайшат Соьлжа-ГIалахь дIахьочу республикин конкурсе. Iаламат жоьпаллин а, говза а декъашхой бара жюрехь берш. Цара хIорамма хаттарш дира мехкаршка гIиллакх-оьздангаллех, динах, къоман кхачанах, къоман исторех, нохчийн матах, литературех, культурех лаьцна. Цул сов, хелхар гайта а дезара мехкарийн, йиш лакха а дезара. Нохчийчоьнан массо а кIоштара ткъех сов йоI яра конкурсехь дакъалоцуш. Иштта хьуьнаре, говза, оьзда мехкарий махкахь алссам хилар вайна массарна а боккха юьхькIам бу. Делахь а, конкурс иза конкурс ю. Цигахь толамхо билгалваккхар тIехь ду тергамхошна. Хала болх бара цаьрга кхаьчнарг а. Эххар а къастийра толамхой а. Веданара Висханова Iайшатана 3-гIа меттиг кхечира. Иза а боккха кхиам бара конкурсехь дуьххьара дакъалоцуш йолчу йоIана. Дийца даьккхинчуьра аьлча, школехь доьшуш йолуш дуьйна башха аз долуш, йиш локхуш яра Iайшат. Юккъера школехь доьшуш йолуш Веданара музыкальни школа чекхъяьккхира цо. Цундела, школа чекхъяьккхина яьлча сихха белхан меттиг карийра. Ша дешначу музыкальни школе хьехархо дIаийцира Висханова Iайшат, кегийчу берашна нотин хьаьркаш Iамаяйта. Баьхначу кхиамех тоам беш яц йоI. Балхана юкъара ца йолуш, Соьлжа-ГIаларчу технологин колледже деша яхара иза, архивистан говзалла караерзо Iалашо йолуш. Теша лаьа, ша билгалъяьккхинчу Iалашоне йоI кхочург хиларх. ХIинца, цкъачунна, Веданарчу культурин цIийнехь болх беш ю йоI. Дика евзаш ю вайн республикехь хIора шарахь дIахьош йолу «Синмехаллаш» цIе йолу проект. Даима а цунна кечам беш шегара гIо-накъосталла оьшуш меттиг еанчохь, цкъа а юьстах ца лаьттина иза. Ша а дакъалаьцна «Синмехаллашкахь». Цуьнан зевнечу озо хаъал тойо Веданарчу мехкарийн хор. Иза цкъа а яц къинхьегамах къехкаш. Ткъа хьаналчу къинхьегамо ца моьттучу дикане кхачаво. Цунна тоьшалла ду Веданара Висханова Iайшат.
А. ДАЧАЕВА
№18, еара, чиллин (февраль) беттан 18-гIа де, 2016 шо