Нохчийн халкъаца дика а, вуон а доькъуш, даима цуьнца цхьаьна яьхна, еха Несин Аймани. Тахана вайн республикехь хьовха луларчу регионашкахь а наггахь стаг хир вац Айманин, цуьнан куьйгаллица болх беш йолчу Кадыров Ахьмад-Хьаьжин цIарах йолчу юкъараллин фондан комаьршонах лаьцна дуьйцуш хазаза. Нохчийчуьрчу, Дагестанерчу, ГIалгIайчуьрчу эзарнаш, эзарнаш нахана сагIийна кхачанан сурсаташ дохьуьйту цо кест-кеста, берашна дарбанаш леладайта ахчанца гIодинарш а бац кхин кIезиг.
Кадырова Айманис гIо-накъосталла дар бахьанехь вайн бIеннаш махкахойн аьтто хилла шайна цIенош дан, могашалла лело, шайн гIуллакх дIадоло, когахIотта. Цуьнан сий-ларам беш, тахана халкъалахь Аману олу цунах.
Тахана гучуяьлла яц Айманин комаьршалла. Тахана гучудаьлла дац цуьнан ийман, догдикалла, гIиллакх, эхь-бехк. И дикаллаш, мехаллаш даима хилла цуьнца. Хилла вайн халкъана хала киртигаш тIехIиттича, зиэран муьраш даьхкича – массо а хенахь. Орамера схьа ду и дерриге а.
Несин Аймани хIокху дуьнен чу еана вайн халкъ махках даьккхинчу луьрачу, къизачу хенахь. Оцу хенан къаьхьа чам бевзина ю иза. ХIетте а цуьнан ден-ненан оцу халонашкахь а ницкъ кхаьчна йоIехь адамалла, бусалбалла, эхь-бехк, стогалла кхион. Жимчохь дуьйна марздина ламаз-марха, Іамийна хьанал-хьарам къасто, халонашна бIо ца къажо.
И дерриге а эшна цунна ша йоккха хилча, дахаран чордачу некъа тIе хIоьттича. Айманигахь доккха ийман а, собар а, доьналла а, стогалла а ца хиллехь Ахьмад-Хьаьжина а хала хилла хир дара халкъ хIаллакьхиларан зиле хIоьттича цунна хьалхавала, цунах долу жоьпалла шена тIелаца. Оцу луьрачу хенахь цунна тешаме гIортор хилла дIахIоьттира Аймани. Кхерчан йовхо, аьхналла латтийра цо Ахьмад-Хьаьжина. Иза къонахчунна кIезиг хIума дац.
Цо лайнарг лалур долуш дукха зударий бац нана-Нохчийчохь. ХIинца-м, тIеман кIуьрлара девлла машаран новкъа довлуш дара вай аьлла хеттачу хенахь ямартчу мостагIийн карах Ахьмад-Хьаьжа велла йисира иза. Оцу бохамо Iовжийна доьлхучуьра дог-бIаьрг сацале Делан кхиэле вирзира кIант – Зелимха… И дерриге а лан мел доккха ийман, собар оьшу! Мел доккха ийман, собар оьшу цул тIаьхьа нахана шегара бала гIайгIа ца гайта? Цуьнан хилир-кха и ийман а, и собар а, и стогалла а.
Корта таIIийна, де-буьйса ца лоьруш нехан хьашташка хьоьжуш а, хьанала къахьоьгуш ю иза. Мокъа еана хан Далла Iибадаташ дарна а, берабераш ша санна оьзда а, гIиллакхе а, яхь йолуш а кхиорна дIало цо. Хьаххийначуьра аьлча, Айманис дукха лерина кхочушдо дерриге а фарзаш а, суннаташ а. Иза жимчохь дуьйна сатесна яра сийлахьчу Макка яхана хьаьждан. Дала цуьнан цу тIехь аьтто бира 1992-чу шарахь. Оцу шарахь дуьххьара ХьаьжцIа яха, КаIбате, Пайхамаран (Делера салам-маршалла хуьлда цунна) Ровзате бIаьрг тоха аьтто хилира Айманин. Цул тIаьхьа а хилла иза оцу езачу меттигашкахь, амма хIинца а дог-ойла цигахь лаьтташ ю иза аьлча цуьрриг а харц хир дац аьлла хета. Иза иштта хоьтуьйтуш цуьнан ийман, комаьршалла, дика гIиллакхаш, беркате гIуллакхаш ду.