2016-гIа шо доладелчахьана Нохчийчу баьхкинчу туристийн барам 7 эзарнал алсамбаьлла.
19-чу февралехь вайн республике туристийн 12 тоба еана (300 сов стаг). Дуьненан маьI-маьIIера баьхкина уьш, дика ца хаахь а, оьрсийн мотт хаьа царах дукхахболчарна. Туристашна юкъахь дукха хуьлу кхуза шозза-кхузза баьхкинарш.
Таханлерчу дийнахь Нохчийчохь болх беш туристийн 16 маршрут ю. (ТIейогIучу хенахь кхин а алсамдаха дагахь бу туристийн некъаш).
Нохчийчу схьакхаьчча дуьххьара туристийн бIаьргаша схьалоцург Соьлжа-ГIалин юкъ ю. Цуьнан ерриге а хазалла схьалоцуш бIаьрг тоха Грозный-Сити комплексан уггаре а лекхачу цIийнан тхов тIерачу хьажаран майдан тIе бовлу уьш. Цигахь, куьйган кера юккъехь санна, ган аьтто хуьлу вайн гIала.
Соьлжа-ГIалига хьаьвсинчул тIаьхьа, уггаре а дукха туристаш кхочуш йолу меттигаш – Аргунан тогIе, Къоьзан Iам бу. Оцу меттигийн Iаламан хазалла суьрташца гойтуш, къоламца йовзуьйту туристаша шайн блогашкахь. Юх-юха а вайн махка кхача лаар билгалдоккху.
Нохчийчу веана цхьа а турист дIа ца воьду жижиг-галнех, чIепалгех, хингалех, вайн кхин долчу даарех ца кхеташ.
Герггарчу хенахь Нохчийчуьрчу туризмах лаьцна хаа луучарна лерина «ВизитЧечня» цIарца газет ду ара дер долуш (баттахь цкъа). Иштта «Нохчийчохь тоьлла юрт» республикин конкурс ю дIакхайкхийна. Цигахь толам баьккхина йолу юрт туристийн маршрутана юкъаяхийта лерина.
Хь.БАХТАЕВА
№23, шинара, бекарг (март) беттан 1-ра де, 2016 шо