Хууш ма-хиллара, Нохчийн Республикин МЧС-н белхахоша республикин школашкахь дIахьош ду бераш цIеяларх лардарна лерина цхьаьнакхетарш. Иштта, дукха хан йоццуш, Теркан районерчу Горагорск поселкерчу №2 йолчу школехь юьхьанцарчу классийн дешархошца а хилира церан цхьаьнакхетар. Иза дIадаьхьира «Кхерамазаллехь йолу Кавказ» цIе йолчу проектан гурашкахь.
Цигахь дакъалоцуш вара Нохчийн Республикин Теркан районан цIарах кIелхьарабахаран № 27 йолчу декъан инспектор Мустафаев Хьусейн. Цо дешархошна дийцира цIеяларх муха ларбала беза а, сирникашца ловзар мегарг цахиларх а лаьцна.
Инспектора берашна йовзийтира цIе яьлча ларъян еза бакъенаш а, экстренни службийн номерш а. Иштта, шен къамелехь цо билгалдаьккхира, МЧС-н белхахошка харц орцанаш дохуш телефонаш еттаро, уьш шайн балхана юкъаха бохуш хилар а, и тайпа «ловзарш» лелийнарш административни жоьпе озо богIуш хилар а.
З.САГАЕВА
Суьрта тIехь: дешархошца цхьаьнакхетар
№27, еара, бекарг (март) беттан 10-гIа де, 2016 шо