Россин тайп-тайпанчу регионашкара Нохчийн Республикин пачхьене хьовса оьхуш болу туристаш сих-сиха го Соьлжа-ГIалин урамашкахь. Дукха хьолахь уьш Кавказан Минералийн Хиш олучу туристийн кластерехь садоIуш болу нах хуьлу. Цигара экскурсица кхочу уьш Соьлжа-ГIала. ХIинццалц кхераме, йоьхна, аьтта дIаяьккхина хилла йолу гIала, тахана туристашна вуно чIогIа тайна. Нахана Соьлжа-ГIале хьаьвсина ца Iаш, Аргуне а, Гуьмсе а, Шела а ган лаьа.
Къаьсттина чIогIа хазахета туристашна «Грозный-Сити» олуш йолу гIишлойн комплекс, «Нохчийчоьнан дог» цIе йолу маьждиг, Кадыров Ахьмад-Хьаьжин цIарах йолу Сийлаллин Аллей, Хьачарахь еш йолу лыжийн «Ведучи» курорт, Къилбаседа Кавказан жовхIар лерина болу Къоьзан Iам, иштта кхийолу меттигаш.
2016-гIа шо доладелчахьана дуьйна Нохчийн Республике кхаьчна 7 000 турист. Луларчу республикашкара хьеший а балош, хIора дийнахь автобусаш кхочу вайн махка. Нохчийн Республикин туристско-экскурсионни гIуллакхийн куратора Исакова Дагмарас билгалдарехь, хьешаша уггаре а дукха хоржучу маршрутех ю Органан чIож а, Къоьзан Iам а.
– Туристаша дуьйцу, шаьш вайн махка бахкаран бахьана феникс-гIала а, мохк а ган лаар ду олий. Уьш цецбуьйлу, дуккха шерашкахь лаьттинчу тIеман лар а йоцуш, масех шарахь мохк юхаметтахIоттарх, – бохуш дуьйцу Д.Исаковас.
Нохчийн Республикехь туризман декъехь долу хьал довза луучарна лерина, кестта газет ду арахеца долор долуш. Цу тIехь туристически объекташ а, церан маршруташ а хир ю билгалъяхна. Цул сов, вайн махкахь мел йолу сийлахь меттигаш а хир ю цу тIехь.
Иштта, дукха хан йоццуш республикехь дIакхайкхийна «Нохчийчоьнан тоьлла юрт» цIе йолу конкурс. Конкурсехь толам баьккхина юрт республикин туристически маршрутана юкъайохуьйтур ю.
И.ХАСАХАНОВ