Хасике чIогIа вуо деанера. Луларчу шен накъоста елла жимачу уьрсан мIаьчиг, хIокхо лелош хаа а елла, йоккхах йолчу йишас, оззийна схьаяьккхинера.
И бохам бахьана долуш, вистхила а дог доцуш, юучунах чам а баьлла, яьхьира цо суьйре. Буьйса а буьрса яра. Наб ца кхеташ веха Iиллира иза, делахь а коьрте хьийзачу ойланаша, хIуъа хилахь а, шена хилла зен меттахIоттадар хьоьхура.
Iуьйранна, самаваьллачул тIаьхьа, йиша лаха вахара Хасик. Иза цунна карийра уьйтIарчу доккхачу цIа чохь, ерриге а хIуманаш кегийна, оьшург дIанисъеш, ца оьшург арайоккхуш йоллуш.
НеIсагIин улло охьалахвелира Хасик. Ша къамел муьлхачу дешнашца долийча нийса хир ду ца хууш, сацавелира иза. Геннара дIаволавелира:
– Хьо хIу деш ю, Хьава?
Хьава схьа а ца хьожуш йистхилира:
– Хьуна ца го?
Юха а, йишига хIун аьлча нийса хир дара ца хууш. Хасика мара хьалауьйзира, масийттазза балдаш туьйхира.
– ГIо дой хьуна? – меллаша, лар а луш хаьттира цо.
Хьавас резайоцуш сихха жоп делира:
– ДIавало, ловза гIо, новкъара дIа а валий…
Амма Хасик меттах ца волуш, тийна Iара. Хьава масийттаза дехьа а, сехьа а, елира хIара дIа а тоттуш. Ойланаша гена вигначу Хасикина цIеххьана хезира цуьнан аз:
– Ца хеза хьуна ас хьайга бохург?
– Вало, и антенна схьа а эций, рагIу кIел дIахьо! Сиха…
сиха… хьалагIаттал! – тIетуьйхира Хьавас.
Цкъа дуьхьало ян дагадеанчу Хасика, сих ца луш элира:
– Йоккха ю иза. Соьга яхьалур яц.
Хьава юха а оьгIазе йистхилира:
– Валал гIаттий! Яхьалур ю хьуна.
Ша Iачуьра меттах а ца волуш, кIанта юха а элира:
– Дика ду. ТIаккха ахь сан урс схьало!
Цуьнца къийсаяла дог доцучу Хьавас, сихха хIара шен кочара ваккха дагахь, резахиларца корта таIийра.
– Дика ду.
– Схьало урс!
– Хьо антенна дIахьой схьавола, тIаккха дIалур ду ас.
Хасик хьалаиккхира. Еза, йоккха антенна мара а йоьллина, цхьа агIо текхош чуьра аравелира иза. Дукха хан ялале юхакхечира, йишига элира:
– ХIинца сан урс схьало!
ХIара новкъаволучу Хьавас чIогIа элира:
– ДIавалол, аравалал кху чуьра! Лур дац! Жима ву хьо хIинца а урс ловзо.
Хасикан дог шелделира, иштта шийла дара цуьнан оьгIазе хьажар. Вист ца хуьлуш, чуьра аравелира кIант. Лами тIе а хIоьттина йишига юхахьаьжира иза, хIинца-м, гIеххьа велакъажар дара цуьнан юьхь тIехь ловзуш.
Ша стенах тасаелла ца кхеташ, цецъяьлла, юхайирзинчу Хьавана гира ша хьалха хиллачохь, меттах ца яьккхича санна, яьржина Iуьллу антенна.
М.МАГОМАЕВА
№28, шот, бекарг (март) беттан 12-гIа де, 2016 шо