Иштта цIе а йолуш хIорашеран республикин шиннан халкъан хелхаран фестивалан-къовсаман хьалхара тур хилира хIокху деношкахь Соьлжа-ГIалин мэрин культурин департаментехь.
Оцу фестивалах лаьцна Соьлжа-ГIалин мэрин культурин департаментан куьйгалхочо Омаева Мадинас дина къамел шун тидаме дуьллу оха.
– Мила ву фестиваль вовшахтоьхнарг?
–ХIара фестиваль вовшахтоьхнарг Нохчийн Республикин культурин министерство а, оцу ведомствона юкъайогIу Халкъан кхоллараллин туш а ю.
– ХIун Iалашонаш ю фестивалан?
–Цуьнан Iалашонаш ю:
– нохчийн халкъан синмехаллаш дIакхайкхор;
– нохчийн халкъан хелхаран культура Iалашъеш, кхидIа кхиор;
– тIекхуьучу чкъурана шайн къоман орамаш а, ламасталлин шиннан хелхаран бакъенаш а, кеп а ларъян Iамор а;
– коллективаша а, хьехархоша а зеделларг вовшашна довзийтар;
– хореографически искусствон ламасталлин культурин тоьлла масалш дендар а, лардар а, кхидIа кхиор а;
– кегийрхошна юкъара халкъан хелхаран похIма дерш схьакъастор, и.дI.кх.
– Муьлхачу билгалонашца къастош бу тоьлларш?
–Уьш хIара тайпа билгалонаш ю:
– конкурсни программин халкъан вад лардар;
– лела хааран нормаш а, бакъенаш а ларъяр, вовшашца тIекаре хиларан культура, къоман духар тIехь товш хилар;
– хелхарехь цхьаннах тера доцу, шен хатI, шен куц хилар;
– исбаьхьаллин чулацам болуш хилар;
– хелхар хьуьнаре а, къегина а хилар;
– къаьсташ хилар;
– шатайпаналла;
– сценически культура;
– хIотторан культура (къоман духар къастор…).
– Мила ву оцу фестивалехь-къовсамехь дакъалаца бакъо йолуш?
– И бакъо ю 16-шарера 25 шаре кхаччалц хенаш йолчу вайн махкахь бехачу похIма долчу кегийрхойн, къоман — культурин автономийн кхоллараллийн коллективийн декъашхойн, Россин субъектийн диаспорийн, СНГ-н, генарчу а, юххерчу а дозанал арахьа бехачийн, муьлххачу къомах уьш хиларх.
– Мила ву тахана оцу фестивалан 1-чу турехь дакъалоцуш?
– Соьлжа-ГIалин мэрин культурин департаментана юкъайогIучу искусствийн учрежденийн хелхарийн студешкахь Iемашберш а, вайн коьртачу шахьаран вузийн а, Нохчийн пачхьалкхан университетан а студенташ бу уьш.
– Хьо йоцург кхин мила вара хьалхарчу туран жюрина юкъахь?
–Уьш бара тхан департаментан хелхаран а, эшаран а «Заманхо» ансамблан исбаьхьаллин куьйгалхо Цакаева Хеда а, оцу коллективан коьрта балетмейстер Цакаев Ренат а, коьрта хормейстер Басиров Акраман а, репетитор Абдулаев Аслан а.
– Маса стаг ву хьалхарчу турехь дакъалоцуш?
– Уьш 76 стаг ву.
– Царах шолгIачу туре ваьлларг маса ву?
– Царах шолгIачу туре ваьлларг 16 йоIIий, 16 кIанттий ду.
– Царах финале валавезарг маса ву?
– Уьш 10 йоIIий, 10 кIанттий ву.
– Маца хила езаш ю финал?
– Финал хIокху шеран 29-чу апрелехь дIаяхьа лерина.
– Мадина, къамел дерзош хIун ала луур дара хьуна?
–Суна сайн а, сайн коллективан а цIарах, уггаре а хьалха, даггара баркалла ала луур дара хIара тайпа проекташ вовшахтохарна, дIаяхьарна тIехь доккха гIо-накъосталла деш, нохчийн къоман культура а, искусство а йоI-бIаьрг санна ларъеш, церан аьрда-бIогIам хилла схьавогIучу мехкан дена Кадыров Рамзанна а, Кадыров Ахьмад-Хьаьжин цIарахчу Регионан юкъараллин фондан куьйгалхочунна Кадырова Айманина а, хIара фестиваль-къовсам вовшахтоьхначу Нохчийчоьнан культурин министрана Дааев Хож-Бауддина а, Халкъан кхоллараллин туьшан директорна Даудов Рамзанна а, церан белхан накъосташна а, соьца цхьаьна жюрина юкъахь хиллачарна а, дакъалаьцначарна а.
Интервью зорбане кечйинарг-
ИБРАГИМОВ Ризван
№29, шинара, бекарг (март) беттан 15-гIа де, 2016 шо