20 март, 1938 шо. Йоккхачу АтагIахь вина Айдаев ЮшаI, филологин Iилманийн доктор, профессор. Дешна Нохч-ГIалгIайн пачхьалкхан хьехархойн институтан филологин факультетан къоман отделенехь (1962-чу шарахь дуьххьара и чекхъяьккхиначарех вара иза). Белхаш бина Нохч-ГIалгIайн историн, меттан, литературин Iилманан-талламан институтан Iилманан секретаран, «Комсомольское племя», «Ленинан некъ» газетийн, Нохч-ГIалгIайн книгийн издательствон коьртачу редакторан, Дешаран белхахойн говзалла лакхаяккхаран нохчийн институтан ректоран, Нохчийн Республикин Iилманийн академин вице-президентан даржашкахь. 100 сов Iилманан белхан автор, цу юкъахь нохчийн барта кхоллараллин а, литературин а проблемех масех монографи а йолуш («Эпически иллешна тIера эпосе кхаччалц», «Нохч-ГIалгIайн советски драматурги», «Дахаран куьзга», «Дахар а, дош а», «Нохчийн, гIалгIайн кицанаш, аларш», «Нохчий: историй, хIинцалера замий»). Цуьнан Iилманан лехамашкахь къаьсттина меттиг дIалоцура нохчийн драматургин истори талларо. Шен дахаран тIаьххьарчу шерашкахь «Нохчийн энциклопеди» язъярна тIехь болх беш вара.
Iилманчин кхалхар хилла 2004-чу шеран июнь беттан 1-чу дийнахь.
20 март, 1950 шо. Казахстанехь вина Умарсултанов Ваха, Россин Федерацин хьакъволу художник. Дешна К.А.Савицкийн цIарахчу Пензерчу исбаьхьаллин училищехь. Цул тIаьхьа Соьлжа-ГIалара №2 йолчу школа-интернатехь суьрташдахкар хьоьхуш болх а бина. Дакъалаьцна Соьлжа-ГIалахь, Махачкалахь, Нальчикехь, Москвахь, Владикавказехь, дуккха а кхечу шахьаршкахь, ткъа иштта Сирехь, Германехь хиллачу гайтамашкахь. Говзанчаша а, хьовсархоша а лаккхара мах хадийна цуьнан «Таргим», «Малхист», «Калаус», «Лаьмнашкахь бIов», «Вайнехан хелхар», «Лаьмнашкахь», «Фермехь», кхидолчу а суьртийн.
1982-чу шарахь дуьйна СССР-н художникийн Союзан декъашхо ву Ваха. 1991-чу шарахь дуьйна Нохчийн Республикин художникийн Союзан правленин председатель а ву. 2010-чу шарахь Россин исбаьхьаллин Академин декъашхо-корреспондент хаьржина.
21 март, 1953 шо. Юккъерчу Азехь вина Исраилов Хожа-Баудди, актер, Нохчийн Республикин халкъан артист. Шен схьавалар Шелан кIоштарчу Гермчигара ду. 1978-чу шарахь Ленинградера театран, музыкин, кинематографин институт чекхъяьккхина веара Хожа-Баудди Х.Нурадиловн цIарахчу нохчийн театре. ХIетахь дуьйна театро наггахь спектакль ца хIоттийна цо дакъа ца лоцуш. Къаьсттина дика нисло актеран комедийни ролаш. Х.-Б.Исраилов вевза похIме художник-карикатурист санна а.
21 март, 1942 шо. Курчалой-Эвлахь вина Муслуев Заур, Россин Федерацин хьакъволу лор. Дешна Къилбаседа ХIирийчуьрчу пачхьалкхан лоьрийн институтехь. 20 шарахь сов Шелан районан больницин коьрта лор лаьттина (1977–1997-чуй шераш). 2000–2007-чуй шерашкахь Нохчийн Республикин могашалла Iалашъяран министран заместитель волуш болх бина. Шозза Нохч-ГIалгIайн АССР-н Лакхарчу Советан депутат хоржу. «Халкъийн доттагIалла» орденан кавалер. 2007-чу шарахь дуьйна пенсехь ву.
№31, шот, бекарг (март) беттан 19-гIа де, 2016 шо