Шемин Iедалан эскарша а, гIаттамхоша а «Иблисан пачхьалкхан» гIеранашкара схьаяьккхина Пальмира шахьар. ХIинца дIахьош ду цигара минаш дIаяхар.
***
ТIаьхьарчу шина дийнахь Шемахь долчу Россин тIеман кеманаша 200 сов тохар дина «Иблисан пачхьалкхан» гIеранийн объекташна, хIаллаквина 300 гергга террорист.
***
Иракан коьртачу шахьарерчу Багдадерчу цхьана стадионехь теракт йина. Оцу бохамехь лаххара а 40 стаг кхелхина, чевнаш хилларш шозза гергга алсам бу.
***
ОвгIанан малхбалехь бакъонаш ларъяран органаша хIаллаквина «Иблисан пачхьалкхан» декъашхо лоруш волу 10 террорист.
***
Пакистанерчу Лахора гIалахь бомба эккхийтина террористаша. Цигахь 50 сов стаг кхелхина, 100 сов стагана чевнаш йина.
***
Iаьрбийн Цхьаьнатоьхначу Эмиратийн Лакхарчу Суьдо кхалххалц набахтехь яккха хан тоьхна терроризмана бехкевеш волчу 11 зуламхочунна.
***
Брюсселан (Бельги) антитеррористически полицис 13 рейд дIаяьхьна. Терроризмана бехке хиларан шеконца схьалаьцна 4 стаг.
***
Кишиневехь йоккха митинг дIаяьхьира Молдови а, Румыни а цхьаьнатохар лууш болчу Молдовин эзарнаш бахархоша.
***
Астанарчу аэропортехь кема охьахаорехь шайгара доккха хьуьнар а, говзалла а гайтина Bek Air кеманан летчикаша. Кеманан хьалхара чкъургаш (шасси) схьа ца еллаеллашехь, кема охьахаийна цара. Цу тIехь 116 пассажир хилла.
***
Россин Президента В.Путина мехкан МВД-н чоьхьарчу эскарийн салтий а, эпсарш а декъалбира и эскарш кхоьллина 205 шо кхачарца.
***
В.Путина Шемин Президент Б.Асад декъалвира Пальмира шахьар террористашкара схьаяккхарца.
***
Ростов гIалахь «Боинг – 737–800» пассажирийн кема доьхча кхелхинчеран гергарчарна компенсацеш дIаделла девлла.
№35, шинара, бекарг (март) беттан 29-гIа де, 2016 шо