«Domofond.ru» портало шен «Avito» партнераца цхьаьна бинчу талламан балха тIехь, Россин юкъараллин-политикин «Газета.ру» коьртачу интернет-изданехь Россин гIаланашна юкъахь уггаре а маьрша ю аьлла Соьлжа-ГIала.
Сайтах пайдаоьцучара Россин гIаланашна юкъахь шайна хетарехь уггаре а кхерамазаллин йолу гIала билгалъяьккхина. Оцу харжамашкахь дакъалаьцна 310 эзар стага.
«Кхерамазалла лакхара ю аьлла билгалъяьхна Ханты-Мансийски автономни округ, Приволжски федеральни округ, Краснодарски край. Иштта, кхерамазаллин ю аьлла билгалъяьккхина Соьлжа-ГIала а», – хаам бо «Газета.ру» изданис.
Оцу талламан дакъалацархоша «Со кхерамазаллин районехь Iаш ву, кхузахь буьйсанна ара вала кхераме дац» аларца хадош бара мах (уггаре а лакхара мах хадор 10 балл йолуш). Соьлжа-ГIала 9,1 баллаца хьалха яьлла. ШолгIачу меттехь Нижневартовск ю 7,6 балл. Ткъа Сочин, Саранскан, Мурманскан, Армавиран кхерамазалла цхьатерра нисъелла – 7,5 балл. Цул тIаьхьа Чебоксары, Сургут, Нижнекамск – 7,4 балл. Тоьллачу итт гIаланах тIаьххьара ю Киров – 7,3 балл йолуш.
Москва 39 меттехь ю, Санкт-Петербург – 49. Ткъа уггаре а кхераме Волгоград лерина, иза 100 меттехь нисъелла.
Хь.АВХАДОВА
№37, шот, оханан (апрель) беттан 2-гIа де, 2016 шо