Шемарчу Пальмира шахьарара хIинцале а 1 230 сов мина дIаяьккхина сапераша. ДIаяха езаш ерш, хетарехь, кхин а алсам ю. ХIокху деношкахь Россерчу саперийн шолгIа тоба а яхана цига.
***
Шеман Iедалан эскарша стомара «Иблисан пачхьалкхан» террористашкара схьаяьккхина Эль-Карьятейн а, Абу-Рваль а гIаланаш.
***
«Иблисан пачхьалкхан» гIеранна юкъахь йолчу масех тобано герзаш диттина Алеппо гIалахь бехачу бахархойн куьпа а, аэропорте а, эскархойн керта а. Цигахь маьрша 6 стаг вийна, 4 стагана чевнаш хилла.
***
«Иблисан пачхьалкхан» лаьтта бухахь хиллачу набахтера цхьаъ ах эзар тутмакх паргIатваьккхина Иракан Iедалан эскарша.
***
Хиш дестар бахьана долуш Пакистанехь бIеннаш цIенош дохийна, кхелхина 50 сов стаг. Iаламан бохам хиларо доккха зен дина халкъан бахамна.
***
ООН-н генеральни Секретара Пан Ги Муна Азербайджанан а, Эрмалойчоьнан а куьйгалхошка кхайкхам бина сихонца Нагорни Карабахера тIом сацор тIедожош.
***
США-хь рельсаш тIера охьаиккхина пассажирийн цIерпошт. Цу тIехь хиллачарах 2 пассажир кхелхина, 30 сов лазийна. Эксперташа чIагIдарехь бохам хилла машиниста цIерпошт тIех чехка хахкарна.
***
Желтойчоьнан Хиос гIайри тIехь йолчу лагерера 800 мигрант ведда. Уьш Европин мехкашка кхача ойла йолуш бу.
***
Еврокомиссара чIагIдарехь Гуьржийчоьнан бахархойн герггарчу хенахь визит йоцуш Евросоюзана юкъайогIучу пачхьалкхашка дIасалела аьтто хир бу. Цул тIаьхьа дукха хан ялале Евросоюза юккъе эца герга ду Гуьржийчоь.
***
Беларуси ВТО юкъаяха лууш ю. Оцу Iалашоне кхачархьама 13 пачхьалкхан куьйгалхошца дийцарш дIадахьа а, цаьрга и гIуллакх къобалдайта а дезар ду Беларусин куьйгаллин.
***
США-н Iедало дIахьедина ша Украинин оборона чIагIяран гIуллакхана 335 миллион доллар дала резахилар.
***
Молдовин куьйгалло дIахьедина ша Россица йолу политикин а, экономикин а юкъаметтигаш чIагIъян а, шоръян а лууш хилар.
№38, шинара, оханан (апрель) беттан 5-гIа де, 2016 шо