Дукха хан йоццуш С.В.Михалковн цIарахчу республикин Берийн библиотекехь литературни «Истоки» журнал ешархошна кхин а кIорггера довзийтарна лерина цхьаьнакхетар хилира. Цигахь дакъалецира №1 йолчу гимназин а, №20, №48 йолчу школийн а дешархоша, библиотекин жигарчу ешархоша. Оцу цхьаьнакхетарехь дакъалаца еанера «Истоки» журналан коьртачу редакторан заместитель Муртазалиева Асет.
Цхьаьнакхетар дIахьош яра библиотекин шатайпа кхиар долчу берийн отделан заведующи Домбаева Амина а, библиотекин жигара ешархо Джаубатырова Хьава а. Баьхкинчаьрга маршалла хаьттинчул тIаьхьа, А.Домбаевас билгалдаьккхира, 2013-чу шарахь «Истоки» журнал арахеца долийна хилар а, – иза вайн республикин къоначу ешархошна маьIне хилам хилар а. Иштта, цо хаийтира, «Истоки» журналехь зорбатухуш долу дийцарш а, туьйранаш а, байташ а, забарш а Берийн библиотекин ешархоша дукха лерина йоьшуш хилар.
Цул тIаьхьа дош делира Муртазалиева Асете. Шен къамелехь цо ешархошна дийцира «Истоки» журналан маьIнех а, иза арахоьцуш дуккха а къахьоьгуш хиларх лаьцна а.
Цхьаьнакхетар дерзош, библиотекин ешархоша «Истоки» журнала тIера шайна хазахетта дийцарш а, байташ а, туьйранаш а дийшира.
З.ХАСИЕВА
Суьрта тIехь: цхьаьнакхетаран дакъалацархой
№46, шот, оханан (апрель) беттан 23-гIа де, 2016 шо