25-гIа апрель, 1936 шо. Хьалха-Мартан кIоштан Iалхан-Юьртахь вина Арсанукав Iабдулла, литературовед, юккъерчу школехь нохчийн литература хьехаран Iилманан-методикин бух биллархойх цхьаъ. Бераллин а, кхиаран а шераш дIадахна Казахски ССР-н Семипалатински областан Урджар юьртахь (дерриге а халкъаца цхьаьна кхалхийначохь). Цигахь чекхъяьккхина юккъера школа а. 1962-чу шарахь чекхйоккху Нохч-ГIалгIайн пачхьалкхан хьехархойн институтан историн-филологин факультетан къоман отделени. Белхаш бина Чечанарчу, ВаларгтIерчу, Iалхан-Юьртарчу юккъерчу школашкахь директор волуш. 1971-чу шарахь дуьйна РСФСР-н дешаран министерствон Къаьмнийн школийн Iилманан-талламан институтан Нохч-ГIалгIайн филиалехь болх бо (Iилманан лакхара белхахо, куьйгалхо). Карарчу хенахь Нохчийн Республикин дешар кхиоран институтан директор. Юккъерчу школина леринчу нохчийн литературин, Iаморан-методикин пособийн, ткъа иштта «Нохчийн яздархой» книгин автор. Россин яздархойн Союзан декъашхо.
27-гIа апрель, 1957 шо. Вина Солтаханов Ширвани, физикин-математикин Iилманийн доктор, Нохчийн Республикин Iилманийн академин декъашхо-корреспондент. Дешна А.А.Ждановн цIарахчу Ленинградерчу пачхьалкхан университетан математикин-механикин факультетехь. Оццу университетехь чекхъяьккхина аспирантура а, докторантура а. 1982-чу шарахь дуьйна Нохчийн пачхьалкхан университетехь Iилманан а, хьехаран а болх беш ву.
Iилманан 100 сов белхан автор. Царна юкъахь ю соавторшца цхьаьна язйина 5 монографи а, университетийн студенташна лерина «Теоритическая механика» учебник а. Россин Iилманийн академин теоретически а, прикладни а механикин Ерригроссин Къоман комитетан декъашхо ву Ширвани. Нохчийн Республикин Iилманан хьакъволу гIуллакххо а, Санкт- Петербургерчу универститетан «За научные труды» совгIатан а, Нохчийн Республикин Интеллектуальни туьшан «Дато бухIа» совгIатан а лауреат ву Ш.Солтаханов.
28-гIа апрель, 1939 шо. Соьлжа-ГIалахь вина Мамакаев Эдуард, Нохчийн Республикин халкъан поэт, Россин Федерацин культурин хьакъволу белхахо. Дешна Нохч-ГIалгIайн пачхьалкхан хьехархойн институтан филологин факультетан къоман отделенехь. Белхаш бина Лаха-Неврерчу юккъерчу школехь хьехархо, «Ленинан некъ» (хIинца «Даймохк») газетан корреспондент, районан культурин отделан заведующи, Нохчийн Республикин яздархойн союзан куьйгалхо волуш. Карарчу хенахь Мамакаев Iаьрбин литературно-мемориальни музейн директор ву.
1958-чу шарахь дуьйна муьран зорбанехь, юкъарчу гуларшкахь сих-сиха гучуюьйлу цуьнан стихаш, очеркаш, дийцарш. 1971-чу шарахь зорбане елира «Седарчий лийр дац» цIе йолу стихийн шен гулар. Цул тIаьхьа тайп-тайпанчу шерашкахь арайийлина «ЧIамарниг», «Берашший, малххий», «Гуьйренан догIа», «Солнце-птица, не спеши садиться» (оьрсийн маттахь), «Бераш-кераш, схьагулло», «Мама золотая» (оьрсийн маттахь) стихийн гуларш.
№46, шот, оханан (апрель) беттан 23-гIа де, 2016 шо