Лараме Мехкан Да Ахьмадан Рамзан!
Хьомсара махкахой!
Тахана исс шо кхечи вайн махкахь НОХЧИЙН МЕТТАН ДЕ билгалдоккхуш долу. Хийла зерех, халонех чекх а буьйлуш, вайн дайша бIеннаш шерашкахь кхиийна, йоI-бIаьрг санна ларбина, деши санна цIена вайга схьакхачийна нохчийн мотт кхидIа а иштта кхио беза, Iамо беза, баржо беза, аьлла, тIе мухIар тоьхна, нохчийн къомана ахь дина деза совгIат а, доккха беркат а ду Ненан меттан де кхайкхор, тхан лараме Паччахь Ахьмадан Рамзан!
Вайн хьалхарчу Президента, нохчийн къоман синкхетаман а, бусалба динан а мехаллаш дика евзаш хиллачу Кадыров Ахьмад-Хьаьжас олура: «Шен мотт боцург – къам дац!» – олий. Баккъал а аьлча, шен мотт хууш, буьйцуш воцург къоман бакъволу воI хила йиш а яц, я цунах патриот хир а вац. Цундела юха а ала лаьа: дукха гена дIа а ца яханчу заманахь, Соьлжа-ГIалахь юкъараллин меттигашкахь я троллейбуса тIехь нохчийн маттахь вай вовшашка дистхилча: «Говорите на русском», – бохуш, Iиттарш а еш, ненан мотт ма-торру бийца а, Iамо а аьтто а боцуш леллачу вайна доккха ниIмат ду НОХЧИЙН МЕТТАН ДЕ хIора шарахь билгалдаккха таро хилар.
Iедалан лаккхарчу тIегIанехь, министерствошкахь, гIаланашкахь, кIошташкахь, хIора а юьртахь оцу денна лерина беш болу белхаш шо шаре мел дели совбуьйлуш бу. Иштта терго ю нохчийн маттахь арахоьцучу литературин, мотт талларна леринчу Iилманан белхийн, ненан маттахь болх бечу хаамийн гIирсийн.
НОХЧИЙН МЕТТАН ДЕ а диллина, вайна и кхиорехь къахьега ерриге а таронаш кхоьллина волу сийлахь Паччахь Ахьмадан Рамзан делкъалван лаьа суна хIокху денца! КхидIа а вайн мехкан, пачхьалкхан чIагIаллин дуьхьа къахьега Дала тхуна дуккха а шерашкахь вахавойла хьо! Иштта декъалбо ас вайн берриге а махкахой! Иштта декъалбо ас республикин дозанал арахьа, юххерчу а, генарчу а мехкашка рицкъанаша дIасабигна, амма ненан мотт а, бусалба дин а, нохчийн гIиллакх-оьздангалла а лардеш бехаш болу берриге а нохчий. Иштта декъалбо ас нохчийн маттах шайн дахаран къилба а дина, дешарехь, Iилманехь, культурехь, журналистикехь шаьш-шайн ца кхоош къахьоьгуш берш а.
Дала тIаьхье беркате йойла вайн!