ХIокху деношкахь Нохчийн пачхьалкхан хьехархойн университетан оьрсийн меттан туьшан куьйгалхочо Саидова Заремас университетан студенташца «Тотальни диктант» цIе йолу акци дIаяьхьира.
Тотальни диктантехь дакъалацар доьхуш, З.Саидовас а, гуманитарни факультетан 3-чу курсан студенташа а Соьлжа-ГIалин урамашкахула буьйла а луш, вайн республикин бахархошка чолхе дешнаш яздайтира, иштта буклеташ а йийкъира. Царна юкъахь нийса язъеш берш а, йозанехь гIалаташ дохуш берш а нислора. Шайга яздойтучу дешнаш тIехь дукха гIалаташ дохучаьрга къаьсттина лерина доьхура цара тотальни диктантехь дакъалацар.
Иштта, шайна тIех волуш мел верг саца а веш, церан хаарш зийра акцин дакъалацархоша. Ткъа республикин бахархоша самукъадаларца яздора и дешнаш. Цхьаболчара, шаьш студенташна тIе а боьлхий, шайга а чолхе дешнаш яздайта олуш меттигаш а нислора. Бахархошна дIасайоькъучу буклеташ тIехь, тотальни диктант маца, стенгахь хир ю дуьйцуш хаам бара.
М.БАЙБАТЫРОВА
№45, еара, оханан (апрель) беттан 21-гIа де, 2016 шо