Стеган оьздангаллин, догцIена хиларан цхьа билгало ю шена дина дика гIуллакх диц цадар, цунна кхин дан гIо дацахь, баркалла алар.
Оцу ойланехь болчарах цхьаъ ю Соьлжа-ГIалин яхархо Гадаева Зулай.
2014-чу шарахь дуьйна могашалла галъяьлла яра Зулай. Лоьраша тайп-тайпана диагноз а хIоттайора цунна (хондроз, грыжа, коьртаца лазар). ТIаьхьарчу хенахь Iасанашца бен дIа а ца яхалуш йисинера иза.
Заводской районан Киров поселкерчу Чатаева Гульнара заведующи йолчу №7 йолчу больнице Неврологин отделени кхечира Зулай. Цига шен-шен хеннахь охьа а юьжуш, дарбанаш деш яра иза. Цуьнан лор-невролог Шамилева Лариса яра.
Оханан (апрель) беттан тIаьххьарчу деношкахь чекхъяьлла Зулайн дарбадаран кхоалгIа курс. ХIинца иза Iасанаш йоцуш лелаш ю, могашалла а дикка тоелла. Цо даггара баркалла боху шега дика хьаьжначу лор-неврологна Шамилева Ларисина.
– Ас дуккха а дарбанаш динера сайн могашалла тоярехьа. Амма хьал денна а эшна догIуш дара Л.Шамилевина тIекхаччалц. Ас даггара баркалла боху соьга хьаьжначу Шамилева Ларисина. Шен болх дика хууш, гIиллакхе, оьзда, къинхетаме лор ю иза. Дела реза хуьлда цунна.
Зулайс дийцарехь, хьалха – Делан къинхетам а, шолгIа Лариса а бахьана долуш гIоли хилла цунна.
З.САГАЕВА
Суьрта тIехь: Шамилева Лариса
№51, шот, хIутосург (май) беттан 7-гIа де, 2016 шо