ХIокху деношкахь араяьлла «СтелаIад» журналан керла номер (шиъ цхьаьна). Даима санна берийн самукъадер долуш хаза кечйина ю цуьнан агIонаш. Берашкахь дика амалш кхиош долу дийцарш а, байташ а алссам ю номерехь.
Журналан хьалхарчу агIон тIехь зорбане даькккхина вайн республикин Куьйгалхочо Нохчийн меттан де дIакхайкхоран хьокъехь долу указ. Циггахь ду Нохчийн Республикин хьалхарчу Президента А-Хь.Кадыровс а, поэта, фольклориста, мохкталлархочо А.Сулеймановс а, Нохчийн Республикин халкъан яздархочо А.Айдамировс а, Нохчийчоьнан халкъан поэта Ш.Арсанукаевс а ненан маттах аьлла дешнаш.
«Ненан мотт – халкъан юьхь ю, орам бу. Шен мотт ца хилча, халкъ хуьлуш дац. ХIора нохчи, нагахь санна шен халкъ дезаш а, Даймохк безаш а велахь, шен ненан мотт Iамош а, хууш а хила веза. Iамадейша дуьненан дерриге а меттанаш, амма цкъа хьалха шайн ненан мотт а Iамабай, оцу маттахь яздан а, деша а Iамадай..» боху А.Айдамировн дешнаш нохчийн дог кийрахь долчу воккхачун а, жимачун а дагах ца кхеташ дуьсур ду аьлла ца хета.
Гапаев Iабдуллин «Iилманан корта» дийцар дешча хуур ду берашна Iилманан а, собаран а, хьекъалан а корта хIун бу.
М.Алиевн «Юьхь» дийцар а, М.Сейлмухановн «Черчийн доьзал» туьйра а бераша, хаза а хеташ, доьшур долуш ду.
Меттан низам – грамматика,
Цуьнгахь меттан догIа ду.
Нагахь иза хаахь дика,
Хьо кхиаме кхочур ву. ... боху М.Ахмадовс «Къамелан дакъош» байта тIехь. Дешархошна мотт Iаморехь пайдехь хир йолуш ю иза.
С-М.Гелагаевс «Дийнатийн дуьненахь» рубрикехь цIоькъаломан тайпанаш а, «Бераша олу…» рубрикехь Ж.Махмаевс берийн забаре аларш а довзуьйту.
Басаршца кечдан сурт а, чехка-нуьцкъаллин а, дегIан меженийн боламехь вовшашца уьйр хилийтаран а хьуьнарш кхиоран «хьокхех ловзар» а берийн тидам тIегIур болуш ду.
Нагахь санна журналан агIонаш йоьшуш берашна ца кхеташ дешнаш нисделлехь, церан маьIна достур ду «СтелаIодан дошамо». Шайн хаарийн тIегIа девзар долуш ю К.Мусаевс вовшахтоьхна хаар – зер кроссворд а.
«СтелаIодан» мужалта тIерачу суьрто (диллинарг – Т.Эльдаров) кхин а хазйо номер.
Л.ДАУТОВА
Авторан сурт
№54, шот, хIутосург (май) беттан 14-гIа де, 2016 шо